Bədən dili — yəni qeyri-verbal ünsiyyət — gündəlik həyatımızda, xüsusilə də iş mühitində düşündüyümüzdən daha böyük rol oynayır. Çox vaxt insanlar yalnız nə dediklərinə fokuslanır, amma əslində necə dediklərimiz, jestlərimiz, baxışlarımız və ümumi duruşumuz mesajımızın təsir gücünü müəyyənləşdirir. Yəni bədən dili bizim sözlərimizi tamamlayan, onları gücləndirən və qarşı tərəfə daha dolğun mesaj ötürməyə kömək edən vasitədir.
Təsəvvür edin, rəhbəriniz sizə “Əla iş gördün” deyir. Bu cümlə motivasiyaedici ola bilər. Amma eyni zamanda sizə gülümsəyir və kürəyinizə dostcasına bir toxunuş edirsə, bu artıq təkcə bir cümlədən ibarət deyil – bu, səmimiyyət və dəyər hissi yaradır. Bədən dili mesajı daha real və inandırıcı göstərir.
Bəzən isə sözlərə ehtiyac olmur. Məsələn, başla “hə” və ya “yox” demək, çiyin silkməklə bilmədiyini ifadə etmək və ya sadəcə istiqamət göstərərək sual cavablandırmaq – bunlar hamısı danışmadan ünsiyyət qurmağın yollarıdır. Bu cür jestlər həm zaman qazandırır, həm də daha təbii qarşılanır.
Bədən dili həm də hissləri və niyyətləri daha aydın göstərmək üçün əla vasitədir. Məsələn, kimsə “Təcili etməliyik!” deyərkən masaya əlini vurursa, bu, tələsikliyi və önəmi vurğulamaq məqsədi daşıya bilər. Lakin bu jestin tonu və konteksti düzgün seçilməzsə, qarşı tərəf onu aqressiv və hətta təhdidedici də qəbul edə bilər. Yəni bədən dili nə qədər güclü alət olsa da, onun necə və harada istifadə edilməsi də bir o qədər vacibdir.
Ünsiyyət təkcə danışmaq deyil. Göz kontaktı, bədən duruşu, əl-qol hərəkətləri, şəxsi məsafə, susmaq və hətta nəfəs alma ritmi belə qarşımızdakına bir mesaj verir. Bütün bunlar bizim kim olduğumuzu, necə düşündüyümüzü və qarşı tərəfə necə yanaşdığımızı göstərir. İstər bir təqdimatda çıxış edək, istər müştəri ilə görüşək, istərsə də komanda daxilində ünsiyyət quraq — bədən dilimiz bizim haqqında ilk təəssüratı formalaşdırır.
Əgər daha yaxşı ünsiyyət qurmaq istəyirsinizsə, ilk növbədə bədən duruşunuza və jestlərinizə fikir verməyə başlayın. Qollarınızı çarpazlamaq, yerində narahat şəkildə tərpənmək və ya göz kontaktından qaçmaq kimi hərəkətlər sizi qapalı və etibarsız göstərə bilər. Əksinə, açıq və rahat duruş, təbii göz kontaktı və uyğun mimika sizi daha inandırıcı, diqqətli və peşəkar göstərəcək.
Həmkarlarınızdan bu sahədə rəy almaq da faydalıdır. Onların sizə baxış bucağı bəzən özünüzün fərqində olmadığınız məqamları üzə çıxara bilər. Kiçik dəyişikliklərlə böyük fərqlər yaratmaq mümkündür.
Qısası, bədən dili yalnız jest və mimika deyil — bu, sizin danışmadan yaratdığınız ilk təəssüratdır. Əgər ünsiyyət bacarıqlarınızı inkişaf etdirmək və daha təsirli olmaq istəyirsinizsə, bu bacarıq üzərində işləmək, təlimlərə qatılmaq və gündəlik qarşılıqlı əlaqələrdə daha çox müşahidə etmək sizi fərqləndirəcək.
